Dr Eiswein

Wos in Retzstodt ächendli wurd nou nie gemacht
Hörn im Jahr 92 a por Winzer ferti gebracht.
Bei e Besprechung im Herwest hörn vier Winzer gsocht: Es word prowiert,
Wenn es Watter mitspielt, •word. heuer a. Eiswein riskiert!
En guete halwe Morche jeder Winzer bei dr Las halt hanglasse tuet,
Dann grod die Silvaner worn im letzte Jahr gsund, un die Öchslegrade aa guet.
Die Wengertszeile hat mer dann voa beide Seite mit Netze schöa zuagedeckt,
Daß niet die Vöichel die Treuwel houle, oder rofalle un senn verreckt.
Im November, im Dezember wor'sch dare Winzer ouft schoa a bissle bang,
Weil's immer gerachert hat, und niet ums Verrecke zua a gscheide Froustnacht tuet lang.
A Weihnachte iss dann Väterchen Froust ower doch nou kumme
Un hat dare Winzer mit 10 Grod Kelt dia Sorche schnall abgenumme.
En Weihnachtssunti früe en halwer siewe wor'sch dann souweit:
Die Winzer worn mit ihrer Helfer in dr Wengert gstanne bereit,
Ausgerüst mit Taschelampe un Kerzli mer die Treuwel halt sou sueche tuet,
Für die zwä Winzer im Würmberg mer es Fluetlicht von Sportplatz eischalte tuet.
Die Treuwel worn steehart gfrouere, mer hat's gor nicht gsane,
Ower beim Ömer- un Butteausleere hat's a moros Geklapper gawe.
In e guete Stunn wor dar Eiswein dank dr viele Helfer bei dr Winzer gelase.
Mer iss freudestrahlend hem, doa hat's en hasse Kaffee und es guets Frühstück gawe.
Sou 31 Zanner hat mer insgsamt bei dare Aktion zamgebracht.
Auf zwä Wache hat mer die Treuwel zuen Kaltem nach Steide gebracht.
Auf dare Fahrt dann iss passiert a neus Malör:
Zwische Retzboch un Himmelstodt wor dr Tank voa dan Bulldog leer.
Dr Beifahrer schnall nach Retzbach zurückgelaffe iss,
Hat agerufe, un gsahnt, daß schnall Sprit beikumme iss.
Die Sunn wor ja schoa gstanne am Himmel ganz groaß;
Die Treuwel döffe doch vor en Kaltem niet auftaa, ja sust war wos loas!
Mit dare kostbare Fracht iss mer ower doch nou rachtzeiti nü nach Steida kumme,
Doa hat dann es Kaltem mit neue Schwierigkeite sein Wach genumme.
Sou guet zwä Hektoliter Eiswein hat mer voa dare 31 Zanner beim Kaltem zamgebracht,
Un mit 192 Öchslegrode hat dar es Spitzeergebnis in dan Jahr voa dr ganze GWF gemacht.
'Die höchstmöglie Punktezahl hat er bei dr Prämierung natürli erreicht;
Doa hat dar Eiswein die Goldmedaille gschafft ganz leicht.
Außer dan Eiswein hat e Silvaner-Auslese un e Beerenauslese aa nou e Goldmedaille eigfohre

Wie mer sieht, senn die Retzstodter Winzer schoa richtia Goldhamster wore.
Wenn ihr dan Eiswein nachert einischlürft, macht's mit Andacht, Ihr Leut!
Ein sehr zum Wohle, des wünscht Euch Euer Roman heut!

Dr Beggaseppr

Dr Beggaseppr wor, des iss ja klar,
A echtes Retzstoodter Original.
Wor mit irdischa Güter niet sou reich bedacht,
Hoat sie müess ploach, un hoat aa gschafft.
Reudi wor ar halt als manche Toch,
Tuat jeden doa, ganz wurscht, war, die Menung soch.
Mir Junga hörn na Strächli gspielt als aa.
Wia dr Seppr hoach geaht, wollte mir halt sah.
Un ar hoat gschennt auf uns un die schlachte Walt; -
Mir hörn uns gfräht üwer dann Spetakel halt.

Ower ee Strächle hoat sie dr Seppr geleist, Ihr Leut,
Un doavo will bericht i heut.
In dr Aare wor'seh, es hoat soll fahr gerachert viel,
Mer iss mit dr Arwet niet fürschi kumme, niet ans Ziel.
Dr Seppr iss mit dr Küha un Maschien grod wieder naus,
Feihert a pormal rüm, schoa rachert's, un's wor wieder aus.
Wenn die Küha im Stool worn, packt na ower dann die Wuet;
Mer hoat's na agsahne, ar woar voller Gluat,
Iss nei dr Kücha und hoat's Kreuz genumma,
Naus en Booch, hoat sie niet lang besunna,
Mitta im Booch stellt ar des Kreuz doa nei
Un schreit doa ziemli laut dabei:
„Sou, du sösst heut aamoal merk, wie schöa iss dess,
Wenn mer en ganza Toch hoat nossa Föeß! „

Faderweißezeit

In e Heckewirtschaft zuer Faderweißezeit
Iss dr Michel un sei Bawet hiegange zue zweit.
In e guete Gsellschaft senn se nei doa kumma,
Sie hörn feist mitgemacht, un aa feist gsunga.
Un weil dar Faderweiße heut grod sou süffi war,
En Michel sei Glos alle Acheblick leer halt wor.
Un aweds spät iss dann dar Michel wore ganz leis.
Mer hat s ne agsahne, sei Gsicht wor auf eemal ganz weiß.
Kurz drauf hat 's en Michel dann von Stuhl gerissa,
Ar iss nausgerennt - wos jetz künnt, tuet jeder wissa:
Mit Glück iss ar grod nau zuen Mistlouch kumma
un schoa hat die Kutzerei ihm grausame Wach genumma.
Weil 's bei dara Kutzerei rächt stürmisch zuaganga iss,
Fleucht raus im hoache Bouche aa sei Gebiss.

A dr Tofel seicht sei Bawet nach geraumer Zeit:
I mueß jetz doch emal guck, wue mei Michel bleit.
Wie se nauskünnt, sieht se, ihr Michel
grabscht mit der Hend auf'en Misthaufe rüm.
Sie seicht; Geh jetz rei un mach doa haus niet rüm!
Ar seicht: Jesses, mei Gebiss, des iss jetz aa nou fort!
Wenn i nur wüßt, wues hiegflouche iss, a welchen Ort!
Sei Fraa, die sehend jetz, weil ar auf en Mist rümsappe tuet.
Ar iss jetz wieder nüchtern, un 's packt ne aa die Wuet:
Zuen Dunnerkeil noumal, des kannste doch niet fass -
Drei Gebisser ho i schoa prowiert, un kees tuet bass!

Dr Oma ihr Temperament

Dr Opa un sei Oma hörn goldene Hachzi gfeiert,
Un doa soll mer was mach draus, wenn mer 50 Jahr iss schoa verheiert.
Des hat des Juwelpaar natürli mit e große Feier aa gemacht,
Bis aweds hörn se in dr Wirtschaft e schöene Sach schoa zamgebracht.
Geiche aweds seicht die Oma zuen Opa - sia hat schoa a por Schoppe getrunke •
Du, Opa, was meenste, heut tät's bei mir nomal funke!
I machet mit dir jetz noamal zua dare Wiese a dann Weidezau,
Wäßte, wue du mie es erstemal sou feist gedrückt, wue die Luft war so lau -
Dess möcht i mit dir a dr gleiche Stell, nach 50 Jahr heut nou emal mach.
Mei größtes Erlebnis war des, soch salwer, des war doch e Sach!

Sie hat en Opa ewäll ümerigstumpt, bis ar aufsteht un geht mit.
Unterwags seicht se nou: Du würst sawe, des geit heut en Hit!
Sie hörn die Wiese un des Eckele aa bal gfunne
Un hörn sie dann halt rächt feist un eng umschlunge.
Auf eemal stöhnt die Oma, stößt raus en entsetzlie Schrei.
Wos haste dann, seicht dr Opa, wos soll dann des sei?
Sou e Getue haste vor 50 Jahr niet gemacht, worscht damals ganz entzückt,
Wenn i die feist a dan Zau ho naufgedrückt!
Vor 50 Jahr, meent die Oma, iss des aa niet sou gange durch die Wode,
Doa war dar Zau a niet elektrisch gelode!

www.retzstadt.de